ҚазАгроҚаржы 9 қарашадан бастап үш лизингтік бағдарлама бойынша өтінім қабылдайды

2026 жылғы 9 қарашадан бастап «ҚазАгроҚаржы» АҚ ауыл шаруашылығы техникасын жеңілдікті лизингке берудің үш бағдарламасы бойынша өтінім қабылдауды қайта бастайды, деп хабарлады компанияның баспасөз қызметі.

«Өз жемшөбіміз» бағдарламасы мал шаруашылығының жем-шөп базасын дамытуға бағытталған. Ол бойынша отандық және шетелдік өндірістің ауыл шаруашылығы және жемшөп дайындау техникасын, сондай-ақ жылжымалы суару жүйелерін 10 жылға дейінгі мерзімге жылдық 6%-бен, кемінде 15% аванспен алуға болады. Бағдарламаға жайылымы және (немесе) шабындығы бар, жемшөп өндіруді немесе дайындауды құжатпен растай алатын мал шаруашылығы субъектілері қатыса алады. Қаржыландыру алынған жылдан кейінгі екі жыл ішінде олар еңбекақы төлеу қорын және салық аударымдарын 10%-ға арттыруға тиіс.

«Жеңілдікті лизинг 6%» бағдарламасы отандық өндірістегі немесе құрастырылған өздігінен жүретін техникаға қолданылады: бастапқы жарнасыз, 10 жылға дейін, жылдық 6%. «Қазақстанда жасалған» бағдарламасы аспалы, тіркемелі және өздігінен жүретін техниканы, сондай-ақ ауыл шаруашылығы және балық өнімдерін әрі биологиялық активтерді тасымалдауға арналған көлікті қамтиды. Техника Қазақстанда өндірілген немесе құрастырылған болуы керек. Шарттары: жылдық 6%, 10 жылға дейін, бастапқы жарна 15%-дан бастап.

Өтінім беру үшін алдымен ҚазАгроҚаржының Telegram-боты арқылы кезекке жазылып, содан кейін компанияның ресми сайтында онлайн-өтінім рәсімдеу қажет.