Павлодар облысы ауыл шаруашылығы жерлерін жалға беру конкурстарын онлайн форматқа көшіреді

Павлодар облысында ауыл шаруашылығы жерлерін жалға беру тәртібі өзгереді. Өтініш беруден бастап конкурс жеңімпазын анықтауға дейінгі барлық рәсім электронды форматқа көшіріледі. Бұл ретте көбірек құжат қажет болады.

Бұл туралы облыстың жер қатынастары басқармасының басшысы Мұрат Хамитов айтты. Бұрын конкурсқа учаскенің ауданы мен жерге орналастыру жобасының бар-жоғы көрсетілетін. Енді жергілікті атқарушы органдар сапалық топырақ картасын да ұсынуға міндетті. Сауда-саттыққа топырағы соңғы 15 жыл ішінде зерттелген учаскелер ғана жіберіледі. Олар бойынша бонитет нәтижелері, геоботаникалық сипаттамалар және жер мен топырақтың сапалық жай-күйі туралы деректер болуы тиіс.

Қазір ауыл шаруашылығы жерлері 10 жылдан 49 жылға дейінгі мерзімге жалға беріледі. Қолданыстағы ережелер бойынша облыста 35 конкурс өткізіліп, жалпы ауданы 214 мың га болатын 343 учаске берілді. Учаскені конкурсқа дайындауға 90 күнге дейін уақыт кетеді, хабарландыру сайтта 45 күн тұрады, ал конкурстың өзі үш сағатқа созылады.

Хамитовтың пайымынша, жаңа жүйе мерзімді екі-үш есе қысқартады. «Бір ай ішінде учаске ойнатылып қойылады деп ойлаймыз», — деді ол. Алайда топырақ әлі барлық учаскелерде зерттелмеген. Сапа туралы деректер жоқ жерлерде конкурсқа шығарылатын жер аз болуы мүмкін.