ШҚО: аграрийлерге 69 мың тонна тыңайтқыш жеткізіліп, жеңілдікті дизель отыны бөлінді

Шығыс Қазақстан облысында өңірдің маусымдық дала жұмыстарына және өнімді сақтауға қалай дайындалғаны туралы айтылды. Баспасөз мәслихатында сөз сөйлеген облыстық ауыл шаруашылығы басқармасы басшысының орынбасары Жаннат Көшерованың айтуынша, биыл шаруашылықтар жасалған шарттар бойынша 69 мың тонна минералдық тыңайтқыш алған.

Егін жинау науқанына ауыл шаруашылығы тауарын өндірушілерге Павлодар мұнай-химия зауытынан жеңілдікті бағамен 19 мың тонна дизель отыны бөлінді. Жаңа өнімнің астығын кептіруге тағы 5,3 мың тонна қарастырылған. Бұл көлем айлар бойынша бөлінді: қыркүйекке 1,43 мың тонна, қазан мен қарашаға 1,95 мың тоннадан.

Қайта өңдеу кәсіпорындарының қуатын қоса алғанда, облыстағы астық қоймаларының жалпы сыйымдылығы 829 мың тоннаны құрайды. Оның ішінде бір мезгілде 253 мың тоннадан астам астық сақтай алатын жеті лицензияланған элеватор бар.

1 қарашадағы жедел деректер бойынша алты лицензияланған элеваторда 77,2 мың тонна астық болған. Оның 1,04 мың тоннасы «НК «Продкорпорация» АҚ-ға тиесілі, ал 76,2 мың тоннасы — қайта өңдеуге арналған астық. Бұл туралы Altainews.kz хабарлайды.