Қазақстанда 24,3 млн тонна астық жиналды — соңғы 15 жылдағы үздік нәтижелердің бірі

ҚР Ауыл шаруашылығы министрлігі Қазақстанда 24,3 млн тонна астық жиналғанын хабарлады. Бұл соңғы 15 жылдағы ең жоғары нәтижелердің бірі. Алдын ала деректер бойынша, элеваторларға түскен жұмсақ бидайдың шамамен 72%-ы үшінші сыныпқа жатады. Сынамалардың 48%-ында клейковина мөлшері 28%-дан асады. Ақмола облысында үшінші сыныпты бидайдың үлесі 90%-ға, ал Hi-Pro санатындағы бидайдың үлесі 70%-ға жетеді.

Соңғы екі маркетингтік жылда Қазақстан астық баламасында 15,5 млн және 16 млн тонна астық пен ұн экспорттады. Бұл тәуелсіздік жылдарындағы рекорд. «Қазақстан темір жолы» ҰК» АҚ деректері бойынша, 2026 жылғы қыркүйектен 19 қазанға дейін 1,657 млн тонна астық экспортталды, бұл 9%-ға көп.

Үш жылда минералды тыңайтқыштарды енгізу көлемі шамамен үш есе өсті. 2025 жылы бұл көрсеткіш 1,8 млн тоннаны құрады. 2026 жылы 2,3 млн тонна жоспардың 2,1 млн тоннасы енгізіліп үлгерді. Элиталық тұқымдардың үлесі 12%-ға жетті.

2026 жылғы егін жинау жұмыстарына 130 мыңнан астам трактор және 29 мың астық жинайтын комбайн қатысты. 2023–2025 жылдары ауыл шаруашылығы техникасының тозу деңгейі 85%-дан 65%-ға дейін төмендеді. Жеңілдетілген лизинг бағдарламасы бойынша аграрийлер 12,7 мыңнан астам трактор және 2 340 комбайн сатып алды. Бұл елдегі трактор мен комбайн паркінің 10%-ға жуығы.