СҚО-да инвестициялық субсидияға берілген барлық 1432 өтінімді қарау мерзімі бұзылды

СҚО кәсіпкерлер палатасының Кәсіпкерлер құқықтарын қорғау және сыбайлас жемқорлыққа қарсы іс-қимыл жөніндегі кеңесінің отырысында ауыл шаруашылығы басқармасы қазір жұмыста тұрған инвестициялық субсидияға берілген барлық 1432 өтінімнің мерзімін өткізіп алғаны анықталды. Заң бойынша шешімге 19 жұмыс күні беріледі, ал кәсіпкерлер оны айлап күтеді. Тіпті мақұлданған төлемдер де бір жылға және одан да ұзаққа кешігуі мүмкін.

Мәселе «Богатырский продукт» ЖШС-ның өтінішінен басталды. Компания пряник шығаратын желіге 69 млн теңге салып, шамамен 17 млн теңгені субсидия есебінен қайтаруды көздеген. Өтінім 22 шілдеде берілді, бірақ оны қарау тек 22 қыркүйекте басталды. Барып тексеруге рұқсат 9 қазанда ресімделді, ал комиссияның келуі қарашаға белгіленді. Құжат қабылдау 15 желтоқсанда аяқталады. Осы күнге дейін шешім болмаса, кәсіпорын биыл өтінімді қайта бере алмайды.

Ауыл шаруашылығы және жер қатынастары басқармасы кешігуді кадр тапшылығымен түсіндірді. Тоғыз салалық бөлімнің әрқайсысында өз бағыты бойынша өтінімдерді бір ғана маман қарайды. «Мұндай қарқынмен жыл соңына дейін жұмыстағы өтінімдерді қарап үлгермейсіз», — деді кеңес төрағасы Инесса Куанова.

Отырыста құжаттарды алдын ала тексеруді жасанды интеллектіге жүктеу ұсынылды. Кеңес басқармаға кәсіпорынға шұғыл түрде комиссия жіберіп, жабдықты тексеру актісін ресімдеуді ұсынды.